الأربعاء 8th June 2011 الصف العاشر
اليوم وأخيرا برحمه من رب العالمين قررت ادارة ال IAT انهم يطلعونا رحله لبوادي ،المهم ... من الباصات لداخل المعهد ،كنا فالاداره << وطبعا معروف الأغلبيه بلبس البيت >>
احنا وطالعين سمعنا وحده من الاداريات تقول محد بيروح الرحله بدون اللبس الرسمي ،بعض البنات .. يمكن من كلاسي ثلاث بس ياييات من بيوتهن بلبس المعهد ،والبعض يايب التنوره بس داخل الشنطه ( لبس المعهد قسم الطالبات عباره عن تنوره وقميص ) والبعض هب لابس ولا يايب أي شي.
الي ما عندها تسير تشتري << تلبس من مخزن المعهد لبس يديد ويخصمون من مكافئتها الشهريه >> يوم رحنا نبا نشتري ؛المسؤول عن المخزن محد ؛وما عرفنا شو نسوي. فهالوقت كانت الوكيله ووحده من الاداريات يرتبن البنات ؛يعني الي لابسه فصوب والي هب لابسه يردونها.
من بداية السنه كانوا يايبيلنا مديره الكل كان يحبها وهي بدورها كانت تعرف كل البنات تقريبا (مس بلندا) كانت تقريبا كل يوم فالبريك تمر ع >>طاوله طاوله ،شله شله ،بنت بنت<<
تسألنا عن أحوالنا ،تسولف معانا ،واذا شافت وحده مخالفه ما تهازبها وتوقعها تعهدات حتى اذا كانت زاخه نفس البنت مرتين وتكون المره الثالثه ؛تناديها باسمها بدهشه وتقول هذا آخر شي كنت أتوقعه منج ،تناصحها ،واذا كانت لابسه اكسسوارات تشلهن بهدوؤ وتقول السبب ليش الاكسسوارات ممنوعه. هذي بس نبذه عنها ،حبيت انكم تعرفون شوي عنها لأنكم بعدين يمكن تقولون ليش الطلبه يطلبون هالاداريه بالذات ،والسبب اني كتبت عنها انه مسؤولين المعهد نقلوها ويابو لنا بدالها وحده عيووووز غبرا (مس بيتريشيا).
العيوز الغبرا مس بيتريشيا ،هي الي رفضت انا انسير<< مع العلم انهم كانو ناويين يودونا دبي ،قالتلنا ندخل فواحد من الكلاسات ونحن ما اهتمينالها ،ردينا عند مسؤول المخزن ولقيناه ،احنا وكنا متيمعين يات وحده من الاستقبال وسألتنا: شو تسوون هني؟ خبرناها السالفه وقالت أوكي سيرن الكلاس وأنا بييبلكن كرتون بحطي فيه تنانير وقمصا وبييب أوراق التوقيع،شكرناها وردينا،يوم قربت من الكلاس جان تعارضها العيوز الغبرا بيتريشيا وتقولها ردي اللبس محد بياخذ<< بالرغم من انهم اذا عطونا بيسحبون من مكافئتنا الشهره الي توصلنا كل شهر يعني بحسابنا ،رمسناها ماشي فايده وردينا انرمسها ع أساس انهم البارحه طلعوا تاسع بدون مشاكل أو تفتيش ،وبنات تاسع كانوا لابسين عبي مفتوحه وجنزات وجحال ومحد رمسهم ،هربنا بنت من الكلاس وسارت عند الاخصائيه عسبت ترمسها عأساس الاخصائيه تقنعهم ،الاخصائيه الله يبارك فيها<< لو انها مرات تتنذل ،قالت بس الي لابسات عبي مسكره وساده يسيرن ،المهم... رحنا ونحن عالسحاب من الفرحه ،والقهر ؛العيوز الغبرا مس بيتريشيا طلعت جدامنا من الله أعلم وين ومدت اديها من الصوبين وهي تقول محد بيسير دخلوا الكلاس ،قلنالها الاخصائيه قالت بس الي لابسين عبي مسكره وساده يسيرون <<طبعا الكل لابس عبي مسكره وساده الغبرا شكلها انقهرت ،وتسير تربع صوب الاخصائيه وتهازبها
طبعا محد يقدر يعارضها لأنها المديره << فديتها مس بلندا لو كانت مكانها كانت بتسمحلنا ،ردينا الكلاس وعذرنا عن السيره قلنالهم ما نبا نسير ردونا البيت ،جان تدخل العيوز الغبره وتقول بتدرسون رضيتن ولا انرضيتن ،ومحد بيرد البيت ،بدا البريك الأول وطلعنا من الكلاس ع أساس انه البريك ،وجان تظهر مرثانيه شرات الينيه وتقول ردن داخل انتن محرومات من البريك.
(مس جالي) الوكيله ؛دخلت الكلاس ورمستنا ،وقالت الحين طلعن ،بعد البزيك قالوا سيرن فوق حبسونا فكلاس هالكلاس ،الممر الي فيه هب نشط ،يعني نادرا ما نمر فيه <<ممر المختبرات ،قعدنا نطبل عالطاولات ونصارخ : البيت ،البيت ،البيت <<احتجاجات.
عبداللطيف مدير معهد فرع العين ؛أثاريهم حابسينا عسبت انه بو الشباب المحترم كان موجود وما يبونا نشتكي ،وقفت بنت تبا تسأل المس وهدى الكلاس :مس ليش انتو حابسينا؟؟ "البنت نفسها تجاوب" لأنه عبد اللطيف موجود وانتوا أصلا خوافين ما تبونا نشتكي ،وقمنا مره ثانيه عالحشره ،[يبون يعرفون من بنات المعهد دواهم] محد قدر يسكتنا ويسيطر علينا ،قلنالهم اذا تبونا نسكت يا تييبولنا عبد اللطيف نرمس معاه يا تردونا البيت ،ورديينا ع الحشره من أول ويديد.
قسمونا كلاسات كل كلاس راح مع مس شله من البنات وأنا منهم ما رحنا الكلاس الي كنا من المفروض انا نروح فيه ،رحنا كلاس ثاني ويات وحده من المسات وقعدت معانا قمنا ورمسنا المس <<دهان سير ،شردن أربع بنات وراحن الاداره ودورن ععبد اللطيف ولقوه بس قبل الاخصائيه وقفتهم وكانت بتردهم بس وحده من البنات شافته من بعيد ونادته بصوت عالي يوم التفت وما تجرأت الاخصائيه انها تردهن الكلاس رمسنه وقال بيتصرف .
قضينا باقي اليوم باللعب ودمرنا المعهد من صريخنا.
يمكن تستغربون ليش احنا محتشرين عبوادي :
هذي أول رحله من أول السنه <<هب من أول الفصل. -ـ-" كنا نترياها عسبت نطلع مع اربيعاتنا وآخرتها يذلونا هالذل!!!
لو أكتب المواقف واحد واحد جان لابي محترق ومنفجر بعد
انشروا الموضوع عسبت يعرف العالم شو هو "معهد التكنولوجيا التطبيقيه" وادارته الخايسه.
أمانه نبا هالموضوع ينتشر ف دوله دوله ،مدينه مدينه ،منطقه منطقه ،حي حي ،شارع شارع ،بيت بيت ،زنقه زنقه ،فرد فرد
والشكر