جاهز\ موضوع شامل بخصوص امتحان السيبا + نصائح عامة ]:.

**طموحي المعالي** · 29-08-2009, 04:30 PM

بسم الله الرحمن الرحيم

السلام عليكم ورحمة الله وبركاته ...

اخواني واخواتي طلاب الثاني عشر ...

حبيت اكتب هالموضوع البسيط وافيدكم باللي اعرفه عن امتحان السيبا
لأني لاحظت الأغلبية ماعندهم فكرة عنه و متخوفين منه ...
صدقووني تراه من أسهل الامتحانات ومب بالصعوبة اللي تتخيلونها ...
وان شاء الله لو استمر تطبيقه هالسنة بتنجحون وبتعدونه بمعدلات عالية ...

اول شي بخبركم عن نظام الامتحان ...
من بداية السنة المدرسة بتنسق وبتسوي كل الاجراءات ...
وما بيكون عليكم غير تتواصلون مع مدرسين ومدرسات المادة وتستعدون للامتحان ...
من ناحية الامتحانات و التدريبات و حفظ الكلمات ...

فالفصل الثاني بيصورونكم صور شخصية فالمدرسة
و بيوزعون عليكم الاوراق الخاصة بالدخول للامتحان واللي فيها بياناتكم قبل الامتحانات بفترة بسيطة ...
واحتمال يوزعون عليكم كتاب فيه تدريبات خاصة بالسيبا ...
و وياه سي دي عبارة عن نسخة الكترونية للتدريب ...

ملاحظة : طريقة الامتحان اما تكون على الورق او بالكمبيوتر ...
على حسب كيف بيكون توزيعكم ...

ننتقل الحين لطريقة الامتحان ...
عندكم 4 أقسام .. :
Structure + Vocabulary + Reading + Writing>>> بهالترتيب

قسم القواعد تقريبا 40 سؤال اختياري ...
تشمل القواعد العامة اللي درسناها طول سنوات الدراسة
بعدها تقريبا 10 اسئلة اشتقاقات كلمات ..
يعني يعطونكم الفعل و الاسم و الصفة و الحال وانتوا تختارون المناسب للجملة ...

بعدين فالقسم الثاني حوالي 40 سؤال كلمات ...
من اللستة اللي بتحفظونها ...
على فكرة المستوى يتدرج من السهل للصعب ...
بس لا تخافوون ^^

القسم الثالث هو قسم الريدينغ ... و انا شفته يعتمد على المهارة فاستغلال الوقت و التعامل مع الفقرات يعني مب صعب وايد
اول قطعة اتكون عبارة عن بروشور اعلان او بوستر ( وظيفي )
وتقريبا هيه اسهل قطعة وتضمنون درجتها

القطعة الثانية ممكن تكون عبارة عن قصة برويها راوي او سيرة حياة ..
او قصة قصيرة عن موضوع اجتماعي من الحياة .. وتكون سهلة

القطعة الثالثة مستواها اصعب شوي ..
موضوعها عن اختراع تكنولوجي او مراحل تطور شي معين عبر التاريخ
يعني فيها تواريخ وارقام وممكن اسماء اشخاص مشهورين

اما القطعة الرابعة اسمحولي مب متذكرة موضوعها
وعلى فكرة يمكن اكون مخربطة فالترتيب بين الثانية والثالثة
بحاول ان شاء الله اوفرلكم النماذج التجريبية للسيبا اذا حصلت فرصة

يوم بتشوفون الاسئلة ونوعيتها صدقوني ما بتحسون انها صعبة
يبالها بس شوية تدريب و تركيز على مهارة التعامل مع النص
واتعرفون كيف اتظهرون الاجابة بحسب نوع السؤال

اخيراً القسم الرابع و الاخير اللي هو التعبير الكتابي
عبارة عن سؤال واحد يشمل موضوع نقاش فيه ايجابيات وسلبيات
وبعد نفس الشي هالقسم يعتمد على المهارة مب على كمية الكلمات اللي تحفظونها

يعني مثلا ممكن يعطونكم موضوع عن ظاهرة منتشرة او مظهر من مظاهر الحياة ويطلبون منكم تكتبون رايكم بدون ما يذكرون شي عن الايجابيات والسلبيات

هنيه انتوا لكم حرية الاختيار :
اما تكتبون مقدمة + فقرة عن الايجابيات + فقرة عن السلبيات + خاتمة فيها رايكم الشخصي ( انتوا مع اي فريق او شو تأيدون )

او تكتبون مقدمة توضحون فيها انكم مأيدين هالشي + فقرة اولى فيها سبب مع امثلة + فقرة ثانية فيها سبب مع امثلة + فقرة ثالثة ( اختيارية ) فيها سبب مع امثلة + خاتمة فيها توصية او تلخيص

او بنفس الطريقة تكتبون وتوضحون انكم معارضين وتذكرون الاشياء السلبية

وممكن صيغة السؤال توضح ان مجموعة من الناس تعتقد ان الشي الفلاني مفيد و جماعة غيرهم يشوفونه ضار ... اكتب رايك ووضح انت تؤيد اي الفريقين مع التعليل ... فهمتوا قصدي ؟!

وشي ارشادات وخطوات معينة لازم تتقيدون بها فالكتابة
يعني مب شرط الموضوع يكون طويل وفيه كلمات صعبة عسب اتحصلون درجة عالية ...
بالعكس الجميل القصيرة و الكلمات البسيطة و الاخطاء القليلة تضمن لكم درجات
و تقسيم الصفحة من ناحية ترك مسافة فبداية كل فقرة وتوضيح فقرات الموضوع ( مقدمة و عرض وخاتمة ) و الخط المرتب هذا بعد عليه درجات

وبس خلصنا الامتحان ... ^^

التكملة ان شاء الله المرة الياية بتكون عن الكلمات و كيف تحفظونها
بعطيكم شوية نصايح مجربة ومفيدة

>>> To Be Continued later ^^

**طموحي المعالي** · 31-08-2009, 03:40 PM

كلمات السيبا ....

يتبع .. ^^

**طموحي المعالي** · 31-08-2009, 03:41 PM

نصائح عامة ....

يتبع ^^

**مـراسـي** · 31-08-2009, 04:00 PM

واحتمال يوزعون عليكم كتاب فيه تدريبات خاصة بالسيبا ...
و وياه سي دي عبارة عن نسخة الكترونية للتدريب ...

أعرف هالشي ..

بالنسبة لباقي الكلام .. فهو جديد بالنسبة لي ..

عزيزتي طموحي المعالي : أشكرك جزيل الشكر لما تبذلينه من أجل تسهيل السيبا علينا ..

وازالة عامل الخوف الذي يخيم عقولنا ..

الله يوفقنا هذا العام .. ولا تنسينا من خالص دعواتك ..

موفقة في دراستك الجامعية غاليتي ..

أرقب تكملة الموضوع ^^

**STORM 2009** · 03-09-2009, 07:17 PM

جـزآك الله كل خيـر أختي الكريمهـ

خآصهـ أن نحن مقبلين على الثانويهـ العامهـ ونحتآج لمثل هذي النصآئح

في ترقب تكملة الموضوع بكل شووق

**بنت جميرا** · 05-09-2009, 03:34 PM

تسلمين عالموضوع الرائع

بس اصعب شي اذا ماكنتي تعرفين القواعد وانا هاي مشكلتي ماعرف القواعد

ممكن تساعدينا وتحطين القواعد << مثلا ليش حطينا فالجمله is ماحطينا of ان شاء الله تفهمين سؤالي

والسمووحه

الموضوع: جاهز\ موضوع شامل بخصوص امتحان السيبا + نصائح عامة ]:.

أدوات الموضوع

عرض

جاهز\ موضوع شامل بخصوص امتحان السيبا + نصائح عامة ]:.

ضوابط المشاركة