التقنيات الحيوية... biotechnology..!!

[كراعين نمله]

مسا الخير // صباح الخير

.
.
اخواني و خواتي
.
تخصص البيولوجيا التطبيقية او التقنيات الحيوية
هو عن علم الوراثة و dna و هالشغلات ..
و هالتخصص يديد بس في جامعة الشارجه ..
و انا متردده عشانه .. لاني ما عرف وين بشتغل
و هل فرص العمل واايده و لا شويه ..
و هل هو صعب و لا سهل ؟؟
.
.
الله يخليكم ساعدوني اذا تقدرون..
.
السموحه منكم

[طموحي المعالي]

اختي كراعين نملة


انا ادرس تقنيات حيوية ... خلصت السنة الاولى الحمدلله ...
خليني اكون صريحة وياج .. ما بجامل ^^


التخصص يديد ... وانطرح تقريبا اول سنة 2009
بس الإقبال حلوو ماشاءالله وعددنا مب شوية مقارنة بباقي التخصصات العلمية ^^


على بداية السنة الياية ان شاء الله بتنطرح مساقات التخصص لطلاب السنة الثالثة بس اغلبية الطلاب بيكونون سنة ثانية
يعني لين الحيين مانعرف شو طبيعة مواد التخصص بالضبط
بس عندنا فكرة عامة عن هالمواد و متحمسييين لها ^^


امممم اذا قررتي تدرسين بايوتكنولوجي بتاخذين ان شاء الله فالسنة الاولى متطلبات جامعية اجبارية او اختيارية على حسب جدولج ( متطلبات الجامعة ترومين تاخذينها فأي وقت وتساعدج عسب تحصلين درجات عالية ترفعلج المعدل بس لو خلصتيها قبل يكون احسن لان معلوماتج تكون فرش ^^ ) + اجباري تاخذين مواد علمية ( تقريبا بيكون جدولج شرات الثنوية )


* general biology 1 , general biology 2 , general biology lab هاي الكورسات لازم تاخذينها فالسنة الاولى لانها تفتحلج مساقات السنة الثانية والثالثة .. وتقريبا مافيها صعوبة كبيرة لانها تشمل كل المواضيع اللي درستيها فالثنوية مع شوية تفصيل واضافات ع الخفييف ^^
* general chemistry + lab , general physics + lab + calculus مساقات عامة ونفس الشي كأنها تلخيص للي درستيه فالثنوية ...


على السنة الثانية تاخذين مساقين تخصص خفااف يعتبرون مقدمة للسنة الثالثة basic biotech + cell biology + تاخذين متطلبات كلية اجبارية ومساقات مساندة : + Computer science + analytical chemistry + lab , organic chemistry + lab + medical english + biostatistics

على السنة الثالثة تكونين مخلصة المتطلبات كلها تقريبا وتتفرغين للتخصص ... الشغل يزيد و المواد تتكثف و تبدين مثل ما يقولون تتعمقييين ... و السنة الرابعة تاخذين فيها كورس مختصر عن كل فرع من فروع التقنيات الحيوية : البيئية + الجينية + النبات ... وتدربين على الندوات + طبعا بروجكت التخرج .. و يوم تتخرجين بيكون عندج بكالوريوس احياء تطبيقية تخصص تقنيات حيوية ويكون المجال مفتوحلج عسب تختارين واحد من الفروع وتتخصصين فيه للماستر ان شاء الله ^^


فالبداية يمكن تحسين المواد صعبة لانج بتدرسين كل شي بالانجليزي و انتي متعودة عليه بالعربي ( لو كنتي طالبة ف مدرسة حكومية ) بس مع الوقت و التكرار و طبعا المراجعة اول بأول بتثبت المعلومة و بتتعودين .. ^^


اممممم بالنسبة لفرص العمل : انا كنت محتاره شراتج قبل ما اختار التخصص .. طبيعي حبووبة اي تخصص يديد مافيه اي خريجين و مب الكل يعرفونه بتحسين ان فرص العمل له مب متوفرة بشكل كبير ... بس الاهتمام قام يزيد مع الوقت و عندنا فرصة للتدريب و التوظيف فأماكن مختلفة ( المختبرات الطبية و الجنائية و مختبرات الاغذية والبيئة و مراكز البحث العلمي ..... )


اهم شي و قبل كل شي ... صلي استخااااارة و خذي وقتج بالتفكير .. قرار اختيار التخصص مب شي هين و تتحملين نتيجته طول سنوات دراستج ... مابا اخووفج بس لازم تكونين مقتنعة و مرتاحة ولا تختارين التخصص الا لو انتي كنتي حابتنه و تحسين انج بتقدرين تمشين فيه ... و شوفي ميولج لاي المواد يعني لو تحبين الاحيا والكيميا بيناسبج التخصص بس لو كنتي من اللي يميلون للرياضيات والفيزياء تراج بس بتدرسينهم بشكل مختصر فالسنة الاولى على اساس تكون عندج خلفية علمية ... اما اذا حبيتي تتوسعين فيهم ممكن تتخصصين رياضيات او فيزياء او تدرسين هندسة ^^


اتمنى اكون وضحتلج اللي تبينه
و اي استفسار ثاني انا حاضرة ^^


بالتوفيييييييق ^^

[كوين]

طموحي للمعالي ... فاي جامعة انتي ؟؟

طراعين نملة .. انا من يومين اكتشتف ان هالتخصص موجود فالدولة وكنت ابا اسافر علشانه .. والحمدلله فتحوه هنيه..

حبيته مثلج والاخت طموحي ما قصتر وضحت لنا واايد .. وانا اموت فشي اسمه كيميا واحياء .. بس سؤال هل الشغل والدراسة عملية ولا مكتبية << سؤال عبيط بس ما عرفت كيف اصيغه ..

دمتي بتميز ...

[دفء الثلج]

يزاكم الله كل خير على الشرح والتوضيح ..

[طموحي المعالي]

العفوو اختي دفء الثلج
حياج الله ^^

اختي كوين
انا ادرس في جامعة الشارجة
وهالتخصص مب موجود فالدولة الا عندنا ^^
جامعتنا متعاونة مع جامعة شيفيلد ف بريطانيا عسب ينسقوون برنامج التخصص
واعتقد المجال مفتوح للتدريب عقب السنة الثالثة ف شيفيلد للي حابين
ويمكن يكون في تعاون بينا وبينهم من حيث تبادل الدكاترة
و خلال السنة اللي طافت كلية العلوم نظمت ندوات و محاضرات ألقوها دكاترة اجانب و عطونا معلومات عن مواضيع و بحوث و دراسات مختلفة مرتبطة بالتخصص .. بالإضافة لمعرض العلوم و مؤتمر البحث العلمي اللي كان لنا مشاركة فيه بإسم القسم ^^

بشكل عام التخصص حلوو و مع انه ما صارله الا سنتين تقريبا بس الإقبال حلو و الدراسة ممتعة ^^

اي استفسار ثاني انا حاضرة
بالتوفيييييييج و ان شاء الله نشووفكم عندنا عقب شهرين و نص ان شاء الله ^^

[طالبو]

طموح عالي إنتِ علمي ولا أدبي ؟

[اخت الحزن]

السلامـ عليكمـ .. من جد مشكورة كثير ويعطيكـ الف العافية ع المعلومات اللي قدمتيها لنا
بس بحكم اننا طالبات جدد أنا ورفيجاتي سجلنا في التقنية الحيوية ، بس عرفنا اننا راح ندخل امتحان فيزيا ورياضيات وطبعا ولا وحدة مننا كانت سامعة عن الموضوع من قبل.. فممكن تقوليلنا ايش هي طبيعة الامتحانات هذي .. وتراا كلنـا نااطرين جوابكـ لاننا من جد حاسين اننا ضايعات .. والف شكر وسوري اذا رااح نتعبكـ معنا ..

[أمواج هائجة]

أنا بعد ناوية أدخل هذا التخصص بعد ما عرفت عنه لكن للأسف سجلت في كلية العلوم الصحية-تغذية- في فرصة إني أغير ولا لا
ضروري ردوا علي

[طموحي المعالي]

طالبو
اكيييد علمي والا ما كنت بقدر اتخصص تقنيات حيوية ^^

اخت الحزن
حبوووبة انا كنت مكانج قبل سنة بالضبط وحسيت بالحيرة و الخوف والتردد و لين اول يوم دوام وانا مب متأكدة من اختياري ^^
بس الحمدلله مع الوقت بديت شوي شوي اتعلم و اكتسب خبرة و الحمدلله المستجدات اللي بدوا دراسة الفصل الثاني كانوا يسألوني انا وربيعاتي و ياخذون راينا يعني كل شخص فينا استفاد و فاد غيره فنفس الوقت ... ^^

شووفي بخصوص امتحان الفيزياء والرياضيات هذا مقرر ع طلاب و طالبات الهندسة + اللي بيتخصصون رياضيات و فيزياء فكلية العلوم (بحسب علمي ) بس مب مقرر على اللي مختارين تخصص التقنيات الحيوية
الهدف من هالامتحانات هو تحديد المستوى في حال كنتي محتايه كورس ريميديال (تمهيدي او تأسيسي) فالفزكس او الماث قبل ما تبدين تاخذين كورسات السنة الاولى (فزكس 1 و 2 .. كالكولس 1 و 2 ) .. يعني باختصار مب مفروض عليكم تاخذوونه انتوا بس مطالبين بشهادة توفل او ايلتس فقط لا غير ^^

في حال انج مخلصة كل اجراءات التسجيل ( مستوفية كل الاوراق المطلوبة + حاجزة كرسي ) و عندج شهادة توفل او ايلتس بالمعدل المطلوب بتستلمين جدولج فأسبوع الإرشاد و بتبدين دراسة نظامية ويانا عقبها بأسبوع ان شاء الله ... واذا ما كنتي مقدمة توفل او ايلتس تقدرين تحجزين توفل فالجامعة او برع ( التواريخ المهمة و الارشادات كلها موجودة فالفايل اللي تستلمينه وقت التسجيل + البروشورات اللي موجودة فمبنى التسجيل + ترومين تشووفين موقع الجامعة )

بالتوفيج لج ولربيعاتج حبوووبة و ان شاء الله نشوووفكم عقب شهرين ^^

أمواج هائجة
الغالية ما دامج ما بديتي دراسة لين الحين ترومين تحولين التخصص بدون اجراءات طويلة و تعقيد .. راجعي قسم التسجيل و شوفي الاجراءات ... و حتى لو بديتي عقب و بغيتي تحولين خلال الفصل المجال مفتوح بس اعتقد الموضوع يطول شوي ... تخصصج حلووو بس اذا حابه تغيرينه استخيري و اتوكلي على الله ... ^^

بالتوفييييييج لليميع
و انا حاضرة لأي سؤال او استفسار ^^

[اخت الحزن]

يعطيكـ ألف عافية ع التوضيح .. من جد ساعدتينا وريحتينا كثير ,, ربي يوفقكـ يالغلا ,, ماكنت راح احصل اكثر من هذي المعلومات من مكاان تاني .. سوري لاني تعبتك معي =)