من وين أبدا بالضبط ؟
والله حيرتونا ..!
احنا طالبات وطلاب ثانوية عامة
والله حرام حرام حراام اللي تسووه فينا
ما أنزل الله به من سلطان..!
على شو بنلحق ؟ خبروني بس ؟
على الامتحانات ..؟ اللي كل يوم وراه يوم امتحان
من الأحد للـ خميس امتحانات تقويمية ..!
لا و كل امتحان أصعب من الثاني، وكل امتحان أطول من الثاني ؟
يجينا امتحان الرياضيات ولا الفيزيا ولا الكيميا من 3 لـ 4 صفحات و لازم نخلصه خلال حصة وحدة ؟
لا .. والحصة 45 دقيقة .. 5 دقائق راحت لين ما تيجي المس
و 5 دقايق لين ما تتكلم و تسلم و تعطينا ملاحظات
شو باقي ..؟ 35 دقيقة ؟ شو نسوي فيهم ؟ نكتشف نظرية ؟
لا.. و أزيدكم من الشعر بيت.. ما بين 3 إلى 10 دقايق يكون تشويش على الطالب لأنه خلال هالوقت المس تيجي تشرح مسألة ولا تحط ملاحظة ولا تجاوب على بنت بصوت عالي ؟
خبروني بالله عليكم شو باقي ؟ من الحصة
غير انه الامتحان يكون تعجيزي و صعب .. واحيانا السؤال ياخذ مني ربع ساعة لين ما يطلع معي الحل .! شو بقيت أنا لباقي الاسئلة من وقت الامتحان ؟
هذا حال الكل فقاعة الامتحان
و لو كنتوا من مدرسة مثل مدرستي التعجيزية بتقولوا معاي حق
اوكيه.. أرجع البيت و يكون عندي مجال مابين 4-5 ساعات دراسة
هذي الساعات شو أسوي فيها ؟ أدرس الامتحان اللي علي واللي دايما يكون فصل كامل و خصوصا بالاحيا والكيميا
ولا احل الواجبات ؟ ولا أراجع اللي أخذناه في الحصة ؟
ولا أدرس امتحان الشفوي ؟ ولا أسوي العرض التقديمي ولا أطلع معلومات عن كذا ولا أحفظ آيات الدين ولا أطلع معاني كلمات الانجليزي ؟
أنا أصلا يوميا ما ادرس غير الامتحان لأنه ياخذ مني طول فترة المغرب والعشا وحتى أحيانا أضطر أقوم الساعة 4 الصبح أكمل دراستي !
والله العظيم لو لقيت وقت أسلم على أهلي ولا أتكلم مع أبوي.. يكون فخاطري أقوم أصلي ركعتين شكر لله.
ولا المشاااريع اللي تطلبوها منا ؟
لازم نكون مخترعين الذرة عشان ناخذ الدرجة الكاملة
مجسم ولا اختراع و تقرير عن الاختراع
و تقرير بحثي عنه كمان
و بروشور..؟ و بوربوينت و لازم نبدع فيه ..!
و فكرة مبتكرة ما سواها احد.. ولا أنقص ؟
( هذا الكلام يصير بمدرستي ) ما اعرف لو يصير معكم
الدولة دفعت بلاوي للشراكة و وفرت مدرسات ومدرسين أجانب
ما أنكر الجهد الكبير اللي سووه..
بس .. قسما بالله العظيم إنه المدرسات الأجانب حتى لو كان معهم ماجستير ما يكونوا بنص كفاءة المدرسات العرب
اللهم بس ( كيفية لفظهم للكلمات ) هذا الشي الوحيد اللي نستفيده يمكن ! أما قواعد ما قواعد ولا اسلوب ولا شرح ماااافي أبدا
من بداية السنة واحنا نلعب بحصة الانجليزي
احنا يااا ناااااس طالبين دراسة من جد.. بكرا ورانا آيلتس ولا توفل ولا سيبا . من وين بنفلح فيهم إذا مستوانا ما اتحسن ؟
أنا طالبة درسوني مدرسات انجليزي كانوا عربيات من أول ابتدائي لين 11 علمي.. وربي ابدااع واحسن منهم مافي بالمقارنة مع هالاجانب اللي ( لا يفقهون شيئا )
الدوام ..! للساعة 3:30 ؟ و ما أرجع البيت إلا و تكون الساعة 4:15 و أحيانا 4:30
ياناااااس ياااا عالم انتوا على بالكم نفهم شي من بعد الساعة 1 ؟
اقول الحمد لله والشكر لو دخل بعقولنا 10% من اللي تقوله المعلمة. لا .. ويااحلاوة لو كان الامتحان الحصة التاسعة ولا الثامنة..! يكون الكتاب بايدنا من أول ركوبنا للباص وحتى بين الحصص و بالفسحتين و بالطابور.. هذا غير اللي تحط الكتاب بالدرج وتدرس منه خلال الحصة..!
حاطيين حصص الانجليزي اول الحصص و الحصص العلمية اواخر الحصص ؟ شو هالعقلية ؟ شو هالتفكير السليم ؟
على بالكم هذا الدوام يؤثر بالطالبات والطلاب بس ؟
شوفوا حال المدرسات والمدرسين
المدرسات عندهم مسؤولياااااااااااااات ما تنعد مابين الاسرة والبيت والمدرسة.
تشوف ولادها و تعطيهم من وقتها ساعة عالأقل ولا تشوف مسؤولياتها في البيت؟
هذا غير انه لازم تحضر لشرح الدرس ولا تكتب امتحانات على الكمبيوتر و أوراق عمل
و تصلح الامتحانات و الدفاتر و الكتب
و ترصد الدرجات.. و تنظم الأنشطة و ترتب وقتها وتحضر الاجتماعات
و تدرس الايلتس المطلوب منها ووووو ........
و تيجي المدرسة و تكون كل هموم الدنيا فوق راسها و تعطينا حصص..
و من كثر الضغوط اللي عليها تحط حرتها و عصبيتها فينا!
تستنا أقل غلطة ولا همسة منا و اتطيح فينا هيا و عصبيتها وتصرخ..!
بالله عليكم المعلم مضغوط و أعصابه تعبانه والطالب مضغوط و حالته ل الله. كيف بيكون التواصل بين الطالب والمعلم .؟
المعلم مكهرب والطالب مكهرب ..! ولا واحد يتحمل الثاني
أصلا المعلم من الضغط اللي عليه ما راح يتقبل يعيد امتحان ولا يراجع التقارير والمشاريع و إذا ناقصة يرجعها للطالب .! مستحيل
رح يقول عساهم ما نجحوا.. عساهم ما جابوا نسبة
ياناس يااا عالم والله حرام!
تعالوا شوفو كم بنت نقلت أدبي عنا
تعلوا شوفوا كم بنت من 12 دخلت عالممرضة خلال هالفترة؟
شوفوا شو الحالات اللي وصلتها ؟ مابيين انهيار و ضغط طالع و ضغط نازل و سكر طالع و سكر نازل وهاي مغمى عليها وهاي حالتها لـ الله ..!
يا طالبات ياا طلاب ياا معلمين
اتكلموا .. وصلوا أصواتكم
ارفعوا كتاب للمنطقة
اتحركوا
هذي مو حالة
حطمتوا آمالنا و مستقبلنا
ما عاد فينا خلق على الدراسة ولا المدرسة ولا على شي
انتوا مو حاطيين فـ بالكم إنه طموحنا ( نسبة )
نرفع فيها راس أهلنا و تسعدنا.. عالأقل نحس إنه تعبنا ما راح عالفاضي
و اتدخلنا جامعة بمنحة ؟!!
كم طالب وطالبة منا.. طموحة إنه يجيب نسبة عالية و يحصل منحة ؟
أنا اتعب و اجتهد من 11 سنة وآخد نسب عالية مابين الـ 98% - 96%
و السنة هذي لو جبت 90 ولا 93% يكون معجزة
يااا مسؤوولين احنا ننتظر منح..
محتاجين لنص الدرجة، للدرجة
والله محتاجين الدرجة
الساكت عن الحق شيطان أخرس
وصلوا صوتكم للمسؤولين
حرااام اللي قاعد يصير
لين متى ؟ حطمتونا والله
رد مع اقتباس
.jpg "الصورة الرمزية سمرفلسطين")
.gif "الصورة الرمزية Manami")
