لعبة الالفاظ المحلية ..~

[Ďřέล๓.ỬẰЄ]

اسمحولي انا طالع بعدين ادش اذا عندي اخطاء خلوها بعدين اعدلها لاتقولين الاجوبه اختي ام مروان

[ع ــيونـ بدويـهـ]

هيه صح لا تحطين الأجوبهـ

أنا بعد أبا أتأكد

[أم مروان الشاعر السويدي]

ما شاء الله عليكم التحسن الوضع ( بعد مشاور الأهل)
بتنقصون درجة لأنه مب من مجهودكم الخاص

في اشوية اخطاء
راح أحط الإجابات وقارنوها وقيمو عماركم..

1) فنر: ليت اخوانا المصريين يقولون عنه فانوس
2) الدختر : المستشفى
3) عييت: ما أبا / ما أقدر
4) ملايم: الباب ملايم لاهو مبطّل ولا مسكّر
5) مواعين: صحون وجدور
6) خديه: ما تعرف شي (غبيه)
7) زريبه: مزرعة
8) دبش: مواشي
9) موايه: يوم اتسلم عالواحد موايه بالخشوم
10) خيشه: يونيه
11) هرمه: ( سبه : ملعونه ) الله يهدي يدانا دوم عالسانهم
12) اهبش: اتفضل أكل
13) حواطه: هياته
14) سفره: غترة الريال
15) علوج : لبان
16) طوي : بئر
17) سيح: بر
18) كشته: رحلة
19) دروازه أصلها هندي: الباب العود باب البيت
20) سامان أصلهاهندي: أغراض
21) هيّد: اصبر شوي شوي
22) حو: يوم تزغر الواحد حووو
23) برنوص: لحاف
24) غبنه: هم وحزن
25) فنْدُوَه: صدر الدجاجة
26) غبشه: أول الصبح الفجر
27) حدري: ادخلي
28) وطّي : نزلي عالأرض
29) واطي: نازل أو صوت واطي : خافت
30) أجلح أملح: مغبّر
31) قري : ايلسي ( قري في بيتج عن الهياته)
32) دوربين: منظار
33) برده أصلها هندي: ستاره
34) ايفوتخ : ايفوح ( اتفوح ريحته/ اتهبي)
35) اسهجه : ريحة السمج/ ريحه هب حلوه
36) ودْيه: مرة من المرت ( كلمة هل البر /البدو يادريم الامارات)

قولـّي يا دريم الامارات معنى:
امبونه:...
بخطف: ....
لا تقول ماعرفهن؟؟!!

[ع ــيونـ بدويـهـ]

ههههههه
أنا ما شاورت غير أبويهـ ..

انزين أنا بجااوب < ترا أنا بعد من أهل البدو (كعبــيهـ)


مبونه : يعني من قبل هو كان جيه ..

يخطف : يتخطى أو يمر .

[أم مروان الشاعر السويدي]

والنعم سمسومة كعبيه جوابج صحيح
أحييك خيال فزاع عاللعبة وتسلم

[ع ــيونـ بدويـهـ]

احم احمـ

ينعمـ بحاالجـ .. والنعمـ بالسويديهـ

أترياج بعد إذا بتحطيــن زوود /

[ALALILI CONAN]

يا أخوان لا تخربون اللعبة ..

يعني كلمة .. كلمة .. لا تستعيلون ..

وعالعموم أسعدت بتواجدكم .. ولكم جزيل الشكر ..

[ع ــيونـ بدويـهـ]

اقتباس:

المشاركة الأصلية كتبت بواسطة خيآل فزآع
يا أخوان لا تخربون اللعبة ..

يعني كلمة .. كلمة .. لا تستعيلون ..

وعالعموم أسعدت بتواجدكم .. ولكم جزيل الشكر ..

السمووحـهـ أخويهـ ما بنعيدهاا مرة ثاانية

[ALALILI CONAN]

:

الموهيم

شو يعني :~

:

خادن

:

[ع ــيونـ بدويـهـ]

فلان خادن فلانه :

يعنـي أحبهاا حب شديــد ..