كلية الطب - جامعة الإمارات - النظام الجديد في عام 2010 - 2011 واللي عقبه إن شاء الله

[البلوشي عز]

بسم الله الرحمن الرحيم

كيف حالكم شباب + بنات

ياللي في الثانويه العامه انتو خلصتوا من الفصل الاول وشفتو نتايجكم وكل شي والحين محتارين اي كليه تدخلون ولا شي ف هالموضوع للي يبا وأو يفكر يدخل كليه الطب - جامعة الإمارات أو يبا يعرف عنها

نفس ما تعرفون (ما ادري اذا ما تعرفون تراني الحين خبرتكم ^^) صار تبديل في نظام دراسة الطب في جامعة الإمارات العربية المتحده وصار تغيير في وايد اشياء هالسنه وبتم التغييرات هاي للسنوات القادمه.

وصار النظام كالتالي:-

الفصل الاول عبارة عن فاونديشن كورس وناخذ فيه المواد التاليه:-

1- فيزيا Physics
2- كيميا Chemistry
3- أحياءBiology
4- لغه وآداب language and literacy
5- بروفيشينال كوميونيكيشنprofissional practice and communication
6- الحاسب الآلي Numeracy and IT


والفصل الثاني لين الرابع عباره عن "بري ميديكال" - 3 فصول -

الفصل الثاني بندرس:

1-cytocology and histology
2- human physiology
3- biochemistry
4- biostatistic and epidemiology
5- human anatomy
6- PP&C

ونحن الحين في الفصل الاول - الفاونديشن كورس - في الفاينل باقلنا يومين ونكون مخلصين هالكورس تماما

فإذا اي حد عنده سؤال عن هالكورس هذا من اللي يبون يدرسون في الكليه السنه اليايه او اللي يبون يعرفون عنها بشكل عام ان شاء الله انا موجود ^^

والدراسه عباره عن 6 سنوات مع البري ميديكال و الفاونديشن ^^

لا تترددون في السؤال عن اي شي فالكليه اذا اعرفه بساعدكم واذا ما اعرفه بسأل لكم وبقولكم عنها ^^

أخوكم البلوشي عز (علي البلوشي - دكتور المستقبل بإذن الله)



*****هذي يعض التعديلات على كلامي اللي قلته فالموقع بما إن مر وقت طويل
1- بالنسبه للشباب كانوا يقبلون الكل بسبب قلة العدد لكن حاليًا يقبلون عدد معين ف محد يتهاون ويقول ماعليه بيقبلوني
2- بالنسبه للامتحان في تغيير شوي عن اللي ذكرته هني -ماذكر شو قلت بالضبط بس تغير شوي الامتحان-
3- في مقابله و هي عباره عن غرف فيها دكاتره يسالونكم عن بعض المواقف اللي تمر في حياتكم سواء المهنيه او الاجتماعيه ويشوفون ردة فعلكم عليها من ناحيه اللغة و الفهم و الاقناع ... الخ
4- الدراسه ما كانت مختلطه لكن في احتمال هالسنه 2017-2018 يخلونه مختلط لطلاب سنه 1 فقط و عقب بيقررون يستمرون او لا حسب اللي يشوفونه من هالدفعة.
5- في الكورس الاول في دراسة لمادة فالطب وهي الاناتومي

كل شي تقريبًا موجود في موقع الجامعه لكن هاي حساباتي للي حاب يستفسر لكثر
Twitter: i3lii_ Snap: dr3li_93
والسموحه عالقصور

تاريخ الاضافه:-

29/7/2017

[The State 0f paRadise]

شكرا لك على مجهودك الطيب أخي العزيز

أتمنى من الله سبحانه وتعالى ان يوفقكم ^-^



موضوع مثبت للطلاب الفاونديشن

[البلوشي عز]

شكرا لك على مجهودك الطيب أخي العزيز

العفو وما اسوي غير الواجب تجاه اخوانا اللي بينظمون لنا السنه الياية ^^

أتمنى من الله سبحانه وتعالى ان يوفقكم ^-^
وياك ان شاء الله لما فيه الخير لك ان شاء الله


موضوع مثبت للطلاب الفاونديشن

مشكور اخوي وما قصرت ^^

يزاك الله خير ويعطيك العافيه ع تثبيت الموضوع

[روح الكعبي]

......... مشكووور اخووية ع المووضوع
....... والله يوفجك يا دكتورناااا


............. الدراسة ف الطب سهلة ولا صعبة
....... تحتاي دراسة وايد ولا الاعتماد ف الكلاس
...... وسمحلية طولت عليك يادكتورناا

[البلوشي عز]

العفو وهذا واجبي ^^
ويوفجكم بعد ان شاء الله للي تبونه وعقبال ما نشوفكم فالكليه ان شاء الله

الدراسه مب صعبه ومب سهله في نفس الوقت لين الحين

بس تحتاج مراجعه وجي لانك بتكون مب في المدرسه اسمع شرح الاستاذ عقب روح البيت والعب

وطبعا ها يعتمد عالدكتور بعض الدكاتره اذا انتبهت لكلاسه تفهم عدل وما يحتاي تذاكر عقب

بس اهم شي الدراسه لكل يوم بيومه عشان ما تحس الامور تصعب عليك عقب

ومسموحه بالحل اختي وسوري يوم رمست استخدمت الاسامي المذكره لان كلامي موجه للكل بشكل عام ^^

[البلوشي عز]

ولله الحمد والشكر والمنه عدى الفصل الاول على خير ^^

[The State 0f paRadise]

الحمدلله

^-^

[البلوشي عز]

^^ مشكور عالمرور

[محمد - اليماحي]

انا ابا اعرف عن كلية الطب اخوية وانا قبلوني من ناحية النسبة بس الحين في الفاونديشن و بعجها عندي متحان قبول طب ومقابلة وخيفان منه ما اعرف شو بيي في لمتحان و ما اعرف شو بيسىلوني في المقابلة بليز ساعدني لو سمحت

[البلوشي عز]

السلام عليكم ورحمة الله وبركاته اخوي محمد

الحين فهمني انت في ثانويه عامة ولا في الاوقرو ؟؟

لان بالنسبه لطلاب الطب ما في اوقرو من هالسنه ترا !!

المهم لا تخاف ابدا في موضوع المقابله والامتحان اللي تقدمو هالسنه هذي كلهم انقبلوا ترا

والمقابله حسب علمي عشان البنات لان عددهم كبير وايد اما الشباب لان عددهم قليل يقبلون الكل

بس طبعا لازم النسبه تكون فوق ال 85% هذا شرطهم الوحيد

وبصراحه نحن الشباب المعضم ما سوولهم المقابله اصلا والبعض سوولهم بس انقبلوا بعد

والامتحان عبارة عن اسئلة بسيطه جدا لا تحاتي فيه ابد

وحياك الله فالكليه تنورها ^^