السلام عليكم

طبعاً لكل منكم رأي

بس اللي فيه مصلحة للطلبه هو المطلوب وما يهم شعوركم الخاص والا كان سوينا كل اللي في خاطرنا وصارت الدنيا مخبوصه .

طبعاً انا طبيب ومالي خص بس يوم من الايام كنت طالب في المدرسه , وعقب درست برع .. يعني مجرب انظمة تعليميه مختلفه ,

أتوقع القرار في البداية بيكون صعب على الكل بس فيه ايجابيات :

- تذكرون يوم كنا نمتحن الكتاب كامل في التسعينات والثمانينات .. في الألفيه الجديده خلوه نظام فصلين وخففوا عالطالب وتحسن الاداء الدراسي

- تحويل المنهج الى ثلاث فصول يعطي فرصة للطالب لدراسه 33 % من المنهج براحه وتركيز وفرصة اقل في خسارة الدرجات والمقدره على التعويض في الفصول الاخرى في حالة التعثر

- النظام الاجنبي في العالم هو نظام ثري سيميسترز .. 3 فصول .. يتيح للطالب والإداريين باخذ بريك منعش يساعدهم للاستمرار حتى المحطة التاليه .

- لو بس يعدلون ساعات الدوام في الصيف بيكون ممتاز

- بالنسبة لعدد المواد اصلن مافي داعي يقللونهن ترا المنهج هو نفسه ومناهجنا صغيره بالنسبه للمستوى العالمي اقولها بصراحه ولا حد يزعل انا ما شفت منهج العلمي مؤخرا بس كنت ادرس ربعي مؤخرا في المنهج الادبي واقول في خاطري شو هالمصخره ها ينقرا كله في يوم واحد وحرام حد يرسب

- انا اشكر القطامي , لانه يسعى للتطوير وما بيسوون هالفكره من فراغ والكل لازم يشجع هالقرار لانه فيه مصلحه عامه ، وبسكم يا عيال زايد من التذمر اشوفكم تعودتوا عالراحه ترا كل شي متوفرلكم .. روحوا شوفو الدول الثانيه كيف عايشين وتعليقاتكم كلها كسل كأنكم مجبورين تدرسون أو ادرسون ومب فاهمين شكلكم انتو ليش تدرسون وحق شو كانه بس تحصلون شهادة وتشتغلون اي شي .