مبروك لك يا نبض قلبي والاحساس
يا ملهمة شاعر هداك القصيده

حقٍ لِبوك اليوم يرفع بك الراس
ويضحك حجاجه بابتسامه فريده

حلمه تحقق واصبح الحلم نبراس
يجني حصيده ما غَرَسْ طيْب بِيْده

لبّسْك من طيبه وم الحكمه ألماس
عقدٍ عليه تْبات عينه سهيده

العِلْم يا بنت العَرَبْ يطرد الياس
ومن جَدّ مثلِكْ صار عالي رصيده

هذا الوطن مِعْطَاءْ من دون مقياس
دار الشيوخ أهل العقول الرشيده

في حبهم يا بنت نشعر بنوماس
هم نورنا في المظلمات الشديده

لْهم نسوم الروح من شِدّة الباس
فدوى لهم في وجه أهل المكيده

واليوم يومِكْ مِيْدي بعود مَياسْ
وابدي مَعَ الأيّام صفحه جديده

عيشي سنين العمر في زحمة الناس
مرفوعة الهامه بروحٍ سعيده

مبروك لِكْ مليار من نبض الانفاس
وعسى مقامك بالصروح المجيده

لعيونك اللى م الخجل صابها انعاس
أقول لك مبروك باجمل قصيده
__________________
تمنياتي لكن بالنجاح والتوفيق