تعريف الوطن
عبد الرزاق منديل - دير الزور (1936-2005)
أريد أحجي.. و أريد اكتب..
و أحب الموت،
و أحب منظر ألف تابوت
و أحب يندفن بيها كل عميل و خاين و"عكروت"
أحب النرجس الغالي
أحب البيرق العالي
أحب نمشي شعب واحد،
و ساعد يشبك الساعد
دعـْار وع الأعادي نفوت
أحب تمطر سمانا والمطر ياقوت
أحب بلادنا تشمخ،
و تعيّد شامنا و بيروت
على وجوه البشر بسمة،
و عدالة تسود كل قسمة
أحب أجيالنا توعى،
و لا تظلّها متل: عكازة و بإيد أعمى
و لا نستورد الأفكار،
و نقوّض أساس الدّار
و نظن الجهل نعمة
الوطن: مو زاد،
لا استيراد،
لا زرع و بلا حصّاد
لا سجن وكبير
و قهر و استعباد
لا كرباج، لا جلاد،
و لا عصفور
ولا أب و مثل لعبة بيد ولاد
الوطن: آه يا الوطن..
مو صيدة.. و لا صيّاد
لا أرمن و لا أكراد،
مو ديري و ميداني
و لا آشوري أو حمصي
و سرياني،
و لا بغدادي أو حموي
و تركماني
الوطن: كل ذول متّحدين
الوطن: كل ذول..
لو لان الصخر.. ما يلين.
الوطن: مو عورة مكشوفة و تسترها ورقة التين
الوطن: بركان من وجدان،
مو رقص ودبج عجيان
ولا جبش القطيع و بالجرس فرحان،
و لا مايوه بكيني
و فكر صيني،
و لا شرقي و لا غربي،
يضحكني... و بعد يومين
يأذيني،
و لا شامي وأردنّي
و ثالث فلسطيني،
ولا العراق،
لا لبنان،
و لا شغلة عشاير.. أو حكم ديني
الوطن: إحنا
الوطن نعمة
الوطن: حب ويغذينا مثل نسمة
الوطن: سوري، و على شفاف البشر نغمة
الوطن: مو رقم كسري و يقبل القسمة
الوطن: مو جوع و لا تخمة
الوطن: قمّـة
الوطن: أمّ و مصانة العرض والكلمة
الـ يمد إيده على أمنا
نقص إيده و نقص خشمه
الوطن: أمّـة
الوطن: إلنا
الوطن: كلنا
الوطن: ساعد مشرّع و لمعاملنا
الوطن: نخوة و كرامة، مو رغيف العيش
الوطن: وحدة عقيدة للشعب و الجيش
الوطن: مو هذا .. أو ذاك
الوطن: مو جومة حياكة
الوطن: سدوة .. الوطن لـُحمة
الوطن: أرض و حبيبة، مسيّجة بالنار
لا قصّـة، و لا أشـعار
لا مشعوذ، و لا غدّار
لا مظلوم، لا جزّار
الوطن: إحنا، و نظل إحنا، الزوابع
للوطن زنّـار
الوطن: سيف العدل هالقاطع و بتـّار
الوطن: سهل وجبل و شلاّل الدماء انهار
الوطن: رمل الجناح و وقفة الأبرار
الوطن: كل الوطن،
هاليعرفون الشرق واليرفضون العار
الوطن: الجنوب، مو الجيوب،
ولا هـوّ القصيدة
على الورق مكتوب
الوطن: ونّـة،
الوطن جنّـة
الوطن:
هالصّــاحوا بعالي الصّـوت كل خاين مهو منّــا.
والسموحـه على القصـور
رد مع اقتباس