أي مصلحة و أي خرابيط!!

لا شوفو المصلحة بس ، جدول طلبة الثانوية العامة اليومي :
نصحى الساعة 5 و نص، نصلي الصبح و ندح فيزيا ولا كيميا للساعة 6 و ربع، نركض نلبس ملابسنا و نحط الشنطة و الله وحده يعلم وزن الشنطة ، يبدا من 20 كيلوجرام و زيد متل ما تحب..
نوصل المدرسة و نركض لنوصل الصف لإن في كووووم من الأسئلة اللي ما لقينالها جواب و لازم تنحل بشكل جماعي قبل الطابور ما يبدا
نروح الطابور مدوخين، و تحية علم و إذاعة مدرسية كافية لجعل ثلاثة أرباع المدرسة أموات ..
يرن الجرس و بسرعة لازم نروح الصف نجهز الطاولات للامتحان في الحصة الأولى .. و تمر ساعات الدراسة و نحنا أموات فعلياً، و النعس و النوم بأعين الجميع، المدرسين و المدرسات، و الطلاب و الطالبات بدون أي استثناء .. و تخلص المدرسة على 4 حصص رياضيات " لنلحق نخلص المنهج لإن بعدنا بأول الدرس الثاني و الكتاب الله أعلم كم وحدة" و حصتين فيزيا لنفس السبب و حصتين أحياء و حصة كيميا خارقة فوق العادة.. مين أسرع يلحق يخلص الدرس عالوقت ..
يخلص الدوام و حياتنا تخلص معاه.. نرجع البيت عالساعة 5 نوصل.. و وين نستحم و نتوضا و نصلي و بسرعة ناكل و نحن واقفين في المطبخ.. ترا ما شي وقت للغدا.. و نركض على مكاتبنا و إلحق ما تلحق .. 10 صفحات واجب لكل مادة من المواد الـ 9 اللي ناخذها كل يوم .. و امتحان تحريري معاه امتحانين ولا 3 شفوي ... و الساعة تصير 2 في الليل و نحن ما بدأنا دراسة الامتحانات بسبب أكوام الواجبات .. في الآخر نبقى صاحيين للساعة 4 و نص .. لوووو كنا محظوظين بننام عالكتب.. غير هالطريقة ما بيمشي النوم.. نصحى عأذان الفجر نركض لنكوي ملابسنا و نجهز الشنطة .. و نتذكر إن في تقرير للمادة الفلانية .. و بسرعة نصلي و نركض عالكومبيوتر لنكتب التقرير .. إن خلص خلص و إن ما خلص علينا العوض ..

و هكذا نروح المدرسة و تعاد القصة نفسها ..
لا و في الويك إند لازم حصة تقوية لإن ما شاالله المدرسين و المدرسات في المدرسة يشرحو و نحن نايمين بسابع نومة .. و لازم نعرف عالأقل شو الموجود بهالكتب الحلوة ..
و يخلص الويك إند عالتقوية و حل واجبين ولا 3 ..
و الموت بيكون مصيرنا على نهاية الفصل الأول ..

فالله يخليكم شوووو المصلحة اللي تتكلمو عنها ؟؟؟؟
أنا انفعلت و فضيت عمري 5 دقايق لأفضضفض ...

تسلمو بس لازم أروح بسرعة لإن علي واجب رياضيات 25 مسألة في الانفصال و واجب فيزيا مراجعة الفصل الـ 40 سؤال و واجب كيميا كتاب النشاط كامل مع مراجعات الأقسام اللي في الكتاب.. وفوق هذا عنا تدريب على essay الإنجلش اللي ما حد يجيب فيه فوق ال 15 من 30 لإن المس عبالها نحن مثلها بلبل في الإنجلش .. و واجب عربي طويييل بالإضافة للبريزينتيشن.. و تقرير لتجربة الأحيا " استخلاص الماء و الأملاح من العظام " و إلخ ... من الأمور المستعصية ..

ادعولنا بالرحمة .. و رسالة أوجهها عن تأخير الدوام .. " ارحموا من في الأرض يرحمكم من في السماء "