عرض للطباعة
السلام عليكم ورحمة الله وبركاته ...
اريد اختار كلية العلوم من بين تخصصاتي اللي راح اختارها
فلقيت اكثر من تخصص في الكلية :(48):
فبليز ساعدوني وفهموني شو هي ها التخصصات
وشو راح يكون سوق العمل ..
يعني شو اللي اقدر اشتغله بعدين
التقنيات الحيوية - الاحياء البيئية-الكيميا -الكيميا التطبيقية
بليييييز ساعدوني والله اني محتاره :(13):
للعلم : تراني بنت بس النك لخيوو
يعني محد يعرف ابد شو ها التخصصات ويقدر يساعدني
لا مو مقعقووووله
><
وعليكم السلام ورحمة الله وبركاته...
ان شاء الله اختي بحاول ارد عليج
بس اول سؤال هذي ال4 تخصصات انتي اخترتيهم والا كيف؟
لان في تخصصات غيرها في كلية العلوم؟
في انتظار الرد
لا ما اخترتهم وفي غيرهم
بس حبيت اعرف شو هي هذي التخصصات
وسوق العمل .. يعني وين بشتغل بعدين ..؟
وشكرا ع الرد ^_^
تخصص التقنيات الحيوية .. اقتباس عن الأخت طموح المعالي
.................................................. ..............
انا ادرس تقنيات حيوية ... خلصت السنة الاولى الحمدلله ...
خليني اكون صريحة وياج .. ما بجامل ^^
التخصص يديد ... وانطرح تقريبا اول سنة 2009
بس الإقبال حلوو ماشاءالله وعددنا مب شوية مقارنة بباقي التخصصات العلمية ^^
على بداية السنة الياية ان شاء الله بتنطرح مساقات التخصص لطلاب السنة الثالثة بس اغلبية الطلاب بيكونون سنة ثانية
يعني لين الحيين مانعرف شو طبيعة مواد التخصص بالضبط
بس عندنا فكرة عامة عن هالمواد و متحمسييين لها ^^
امممم اذا قررتي تدرسين بايوتكنولوجي بتاخذين ان شاء الله فالسنة الاولى متطلبات جامعية اجبارية او اختيارية على حسب جدولج ( متطلبات الجامعة ترومين تاخذينها فأي وقت وتساعدج عسب تحصلين درجات عالية ترفعلج المعدل بس لو خلصتيها قبل يكون احسن لان معلوماتج تكون فرش ^^ ) + اجباري تاخذين مواد علمية ( تقريبا بيكون جدولج شرات الثنوية )
* general biology 1 , general biology 2 , general biology lab هاي الكورسات لازم تاخذينها فالسنة الاولى لانها تفتحلج مساقات السنة الثانية والثالثة .. وتقريبا مافيها صعوبة كبيرة لانها تشمل كل المواضيع اللي درستيها فالثنوية مع شوية تفصيل واضافات ع الخفييف ^^
* general chemistry + lab , general physics + lab + calculus مساقات عامة ونفس الشي كأنها تلخيص للي درستيه فالثنوية ...
على السنة الثانية تاخذين مساقين تخصص خفااف يعتبرون مقدمة للسنة الثالثة basic biotech + cell biology + تاخذين متطلبات كلية اجبارية ومساقات مساندة : + Computer science + analytical chemistry + lab , organic chemistry + lab + medical english + biostatistics
على السنة الثالثة تكونين مخلصة المتطلبات كلها تقريبا وتتفرغين للتخصص ... الشغل يزيد و المواد تتكثف و تبدين مثل ما يقولون تتعمقييين ... و السنة الرابعة تاخذين فيها كورس مختصر عن كل فرع من فروع التقنيات الحيوية : البيئية + الجينية + النبات ... وتدربين على الندوات + طبعا بروجكت التخرج .. و يوم تتخرجين بيكون عندج بكالوريوس احياء تطبيقية تخصص تقنيات حيوية ويكون المجال مفتوحلج عسب تختارين واحد من الفروع وتتخصصين فيه للماستر ان شاء الله ^^
فالبداية يمكن تحسين المواد صعبة لانج بتدرسين كل شي بالانجليزي و انتي متعودة عليه بالعربي ( لو كنتي طالبة ف مدرسة حكومية ) بس مع الوقت و التكرار و طبعا المراجعة اول بأول بتثبت المعلومة و بتتعودين .. ^^
اممممم بالنسبة لفرص العمل : انا كنت محتاره شراتج قبل ما اختار التخصص .. طبيعي حبووبة اي تخصص يديد مافيه اي خريجين و مب الكل يعرفونه بتحسين ان فرص العمل له مب متوفرة بشكل كبير ... بس الاهتمام قام يزيد مع الوقت و عندنا فرصة للتدريب و التوظيف فأماكن مختلفة ( المختبرات الطبية و الجنائية و مختبرات الاغذية والبيئة و مراكز البحث العلمي ..... )
اهم شي و قبل كل شي ... صلي استخااااارة و خذي وقتج بالتفكير .. قرار اختيار التخصص مب شي هين و تتحملين نتيجته طول سنوات دراستج ... مابا اخووفج بس لازم تكونين مقتنعة و مرتاحة ولا تختارين التخصص الا لو انتي كنتي حابتنه و تحسين انج بتقدرين تمشين فيه ... و شوفي ميولج لاي المواد يعني لو تحبين الاحيا والكيميا بيناسبج التخصص بس لو كنتي من اللي يميلون للرياضيات والفيزياء تراج بس بتدرسينهم بشكل مختصر فالسنة الاولى على اساس تكون عندج خلفية علمية ... اما اذا حبيتي تتوسعين فيهم ممكن تتخصصين رياضيات او فيزياء او تدرسين هندسة ^^
.................................................. ..............
تخصص الاحياء البيئية
اقتباس
الاحياء البيئية مختصة بأمور البيئة ومشاكلها والتلوث
ولكن سوف تتطرق لدراسه عالم الانسان والحيوان والنبات
والبيئة
سوق العمل ممكن في المختبرات الزراعية
مراقب بيئي او مشرف بيئي في وزاره البيئة والشؤون المناخية
ممكن في الديوان
وممكن في شركات النفط كمراقب بيئي
.................................................. ..............
هذا اللي اقدرت اجيبه..
رأيي ان هذي التخصصات نادرة .. وصعبة شوي تحصلين فيها وظيفة
الا اذا كنت يعني تدرسين منحة بيوظفوج بعد التخرج مباشرة..
بالتوفيق ان شاء الله تعالى...
ثانكس ع الرد ^^