اللي يبا يعرف الفرق بين امتحان الايلتس و التوفل يدش
السلام عليكم،،، اخواني خواتي اللي مخلصين الثانوية العامة و اللي محتارين يمتحنون ايلتس او توفل ... بحاول ان اوضح لكم النقاط اللي اعرفها ع حسب خبرتي ،،
ما عندي خلفية كثيرة عن امتحان التوفل ،، بس اللي اعرفه ان امتحان الايلتس اسهل بوايد عن امتحان التوفل (هو يعتمد اي امتحان توفل تمتحنونه،، IBT او PBT).
**امتحان التوفل IBT هو اختصار ل Internet based test ،،، واللي يمتحنونه عن طريق الانترنت ،، و المهارات اللي بتمتحنون فيها هي listening // reading // writing // speaking ،، و ما بتكتبون اجوبتكم ع ورقة،،، بتكتبونها ع الكمبيوتر ،،، يعني مثلا في listening بتسمعون المقطع الصوتي ،،، بعدين بتجوفون الاسئلة و عندكم وقت محدد عسب تحلون الاسئلة ،، و عقب بيطرشون اجوبتكم للتصحيح فامريكا (ع ما اظن)..
**امتحان التوفل PBT هو اختصار ل Paper based test،، اللي يمتحنونه على ورقة ،، بس مادري كيف هي نوعية الاسئلة ،، اظني فيها جرامر.
**بالنسبة لامتحان الايلتس شيء امتحانين (academic/ general) طبعا اللي يبون يدخلون الجامعة بيمتحنون الاكادميك ،،
فامتحان الايلتس اكاديمك بتمتحنون فنفس مهارات التوفل ibt ،، يعني listening/ reading/ writing/ speaking ،، بس الفرق هو ان فامتحان الايلتس بتمتحنون ع ورقة،، و فالتوفل ibt على الكمبيوتر .و بحاول اكتب باختصار عن نوعية الاسئلة فالايلتس:
Listening: اربعين سؤال ،، و الاسئلة تتنوع بين الاختيارات و الفراغات و التوصيل و صح او خطأ،، الفرق بينه و بين امتحان التوفل ibt هو ان فالايلتس يعطونكم وقت (دقيقتين) عسب تقروون الاسئلة قبل لا تسمعون المقطع الصوتي ،،، بس فالتوفل ibt بتجوفون الاسئلة بعد ما تسمعون المقطع الصوتي،، يعني لازم تاخذون نوتس خلال الاستماع ،، و بالاعتماد على النوتس تحلون الاسئلة ..
Reading: اربعين سؤال موزعة على 3 قطع ،، و الاسئلة تتنوع بين الفراغات و الاختيارات و الصح او خطأ و التوصيل و اختيار الفكرة المناسبة و ..عندكم 3 قطع و ساعة واحدة للاجابة على كل الاسئلة،، يعني ماكسيمام عندكم 20 دقيقة عسب تقروون كل قطعة و تحلون اسئلتها ..
Writing: بتكتبون فموضوعين،، الموضوع الاول بيكون غالبا عن ارقام و احصاءات و رسوم بيانية ،، يعني مثلا يمكن يبون لكم رسمين بيانيين لهوايات الاشخاص فدولتين معينتين، و انتو لازم تقارنون بين هالرسمين بحيث انكم تستخدمون الارقام الموجودة عسب تكتبون ع الاقل 150 كلمة، أما الموضوع الثاني هو كتابة مقال ،،، مثال: يرى الكثير من الناس ان استخدام الانترنت قد ساعد كثيرا في تيسير الحياة ،، بينما يرى الاخرون ان للانترنت مساوئ حيث بدا وسيلة لقضاء وقت الفراغ بدلا عن القيام بامور اخرى،، كما انه وسيلة سهلة للمجرمين للاحتيال على الاخرين .. ناقش رأيك بالأدلة .. لازم ع الاقل تكتبون 250 كلمة،،، و عندكم ساعة واحدة للكتابة فالموضوعين ،، الموضوع الاول 20 دقيقة و الموضوع الثاني 40 دقيقة..
Speaking: تتنوع الاسئلة ...
بالنسبة للتسجيل للايلتس تروحون british council و رسوم التسجيل 800 درهم (هذا لو ما زادوه).
وبالنسبة للتوفلibt ،، لازم تسألون و تجوفون فاي معهد يمتحنون هالامتحان...
انا عن نفسي رحت خذت دورة الايلتس فمعهد اللغات و بصراحة واايد استفدت
بشكل عام،،، انا اجوف ان امتحان الايلتس اسهل بوايد عن التوفل ibt ،،، لانكم تمتحنون الايلتس ع ورقة ، و هالشيء اريح و احسن بوايد ،،
بس ما الزمكم بهالشيء ،، القرار النهائي لكم :) ،، و لا تنسىون تصلون استخارة
اتمنى ان اكون موضحة النقاط اللي كنتو تبون تعرفونها
بالتوفيق :)
و السموحة ع القصور
