المساعد الشخصي الرقمي

مشاهدة النسخة كاملة : تدرس في جامعة الشارجة .. قربوا قربوا ... ^^



انسة انيقة
31-03-2011, 03:50 PM
السلام عليكم
شحالكم
1 - كيف يكون نظام الدراسة الطب في هاي الجامعة ؟

2 - وصدق ان لازم الشخص الي يبا يدش هآآ تخصص تكون نسبته 95 في اول ثانوي و 90 في ثاني ثانوي و85 في ثالث ثانوي ؟

3 - وكيف تكون الاجواء العامة للدراسة مم من جميع النواحي وهل مختلط ولا ؟

4 - هل تعامل الدكاترة الي يدرسون ممتاز او جيد او جيدجدا ؟

5 - هل دراسة طب الاسنان في جامعة عيمان افضل من الشارجة ؟

6 - كم رسوم الجامعة وعدد سنوات الدراسة فيها في جامعة شارجة وعيمان ؟


اذا سجلت في جامعة الشارجة " طب الأسنان "
هل من صعب يوافقون عليه ولا .. او في اقبال عليه وااايد
واذا اكنت نسبتي فوق المطلوب
هل ان الاولوية للمواطن ولا مافي فرق
هل شروط قبول يدققون عليها ولا لا
وقريت في الموقع ان في تنافس عسب جي خايفة ><
وبليييز عطوني معلوماتكم عن التسجيل والقبوول
وسولفولي عن حياتكم الجامعية ^^
وصدف بكون ممنونه لكم

Zayed Girl
31-03-2011, 08:20 PM
انا عن نفسي ما عندي معلومات للأسف :( بعدني صغيره :( :(
اللي اقدر اقوله انه ممكن يكون فيه اولويه للمواطنين خاصه اللي نسبهم عاليه
السموحه

TheRoyale
01-04-2011, 03:45 PM
السلام عليكم
شحالكم
وعليكم السلام ورحمة الله وبركاته،، حمدلله بخير واخبارج؟

1 - كيف يكون نظام الدراسة الطب في هاي الجامعة ؟
ما ادري

2 - وصدق ان لازم الشخص الي يبا يدش هآآ تخصص تكون نسبته 95 في اول ثانوي و 90 في ثاني ثانوي و85 في ثالث ثانوي ؟
لا مب شرط، هذا حق التسجيل مبكر فقط، لازم يكون نسبتج في العاشر 90% والحادي عشر 90% هذا اذا تبين تدشين طب الاسنان..


3 - وكيف تكون الاجواء العامة للدراسة مم من جميع النواحي وهل مختلط ولا ؟
والله ما ادري انا توني مسجل وما بديت الدراسة


4 - هل تعامل الدكاترة الي يدرسون ممتاز او جيد او جيدجدا ؟
لا اعلم


5 - هل دراسة طب الاسنان في جامعة عيمان افضل من الشارجة ؟
ما عندي فكرة بس اللي ادري عن جامعة الشارقة عندهم مستشفى داخل الجامعة
بيعطوج تدريب ميداني في السنة الثالثة او الرابعة هذا اللي ادري


6 - كم رسوم الجامعة وعدد سنوات الدراسة فيها في جامعة شارجة وعيمان ؟
6 سنوات = سنة تأسيسية (42 الف درهم تقريبا) و5 سنوات دراسة وتطبيق (82 الف و680 درهم للسنة)
ما ادري عن جامعة عجمان..

اذا سجلت في جامعة الشارجة " طب الأسنان "
هل من صعب يوافقون عليه ولا .. او في اقبال عليه وااايد
واذا اكنت نسبتي فوق المطلوب
هل ان الاولوية للمواطن ولا مافي فرق
هل شروط قبول يدققون عليها ولا لا
وقريت في الموقع ان في تنافس عسب جي خايفة ><
وبليييز عطوني معلوماتكم عن التسجيل والقبوول
وسولفولي عن حياتكم الجامعية ^^
وصدف بكون ممنونه لكم
على حسب ما عرفت الأولوية للتسجيل المبكر عشان كذي رحت وسجلت
وبالنسبة لشروط القبول ايوا يدققون في النسب يعني لازم يكون فوق ال80%...





وأي شيء ثاني حاضرين
بالتوفيق ان شاء الله...

انسة انيقة
07-04-2011, 12:19 AM
مشكور اخوي والله يوفقك
وان شا الله تكون الاول على الدفعة

par
11-04-2011, 09:07 AM
و عليكم السلام اختي ،،،
1 - نظام دراسة الطب فجامعة الشارقة ما يعتمد على النظام التقليدي (المحاضرات)، لكن يعتمد ع النظام الحديث اللي يجمع بين المحاضرات و التعاون مع المجموعة اللي يكون فيها الطالب لتحليل الحالات المرضية اللي ياخذها كل اسبوع و عمل بحوث و عروض تقديمية،،، و بالنسبة للجزء العملي اول شيء طلاب الطب يتدربون فالمختبرات و يتعلمون الاساسيات، و بدءا من السنة الثالثة ( يعني مع سنة الفاونديشين بيكون فالسنة الرابعة) تبتدي الزيارات الى المستشفيات.. و اجمالي سنوات الدراسة هي 7 سنوات (سنة فاونديشين + 5 سنوات+ سنة تدريبية)
2 - اللي اعرفه ان نسبة الثانوية العامة لازم تكون فوق 85 ، لان لما رحت اسجل بس طلبوا مني شهادة الثانوية العامة ، و ما طلبوا مني شهادة صف العاشر او الحادي عشر...
3 - نعم مختلط فكل الكلاسات ...
4 - مممم بكل صراحة، اكثر الدكاترة تعاملهم مع الطلبة ممتاز، و شرحهم ممتاز،،،، بس شيء بعد دكاترة تعاملهم و اسلوبهم فالتعامل مب شيء ،،، لكن بشكل عام التعامل مع طالب الطب يكون باحترام ...
5- ماعرف ،، بس سامعة ان دراسة طب الاسنان فجامعة الشارجة احسن ،، و الله اعلم
6-بالنسبة لجامعة الشارجة ... سنة الفاونديشين تقريبا 42000،،، لكن فالسنوات الياية الرسوم تكون 82000 تقريباًً ، بس شيء منح للمواطنين ...
7- طبعاً شيء اقبال ع كلية الطب و طب الاسنان فجامعة الشارجة ، و المقاعد تكون محدودة (كل سنة يقبلون 150 طالب فكلية الطب، و 150 طالب فكلية طب الاسنان)،،، و يبدون الدراسة فسنة الفاونديشين، و فنهاية هالسنة اعلى 100 طالب من كل كلية بيدخلون السنة الياية (سنوات التخصص) ، و ال 50 الباجين اللي ما تم قبولهم لازم يعيدون سنة الفاونديشين مرة ثانية ، او يغيرون التخصص ( بس ع حسب علمي هالسنة تم قبول 167 طالب فكلية الطب،،، بس بعد السمستر الاول 30 طلعوا من الطب خخخخ ، ترى دراسة الطب مب سهلة يبا لها شد حيل )
بالنسبة لشروط القبول:
-نسبة شهادة الثانوية العامة تكون 85 و فوق ،،
- الحصول على معدل تراكمي 5 اوفوق فالايلتس ،، و لازم درجة كل مهارة تكون 5 و فوق ( لان لو المعدل كان 5 بس مثلا فمهارة الاستماع الدرجة كانت اقل عن 5 ،، الطالب يقدر ينزل مساقات، بس بيعطونه دروس تقوية فهالمهارة)،،، او ما يعادلها فالتوفل
الاوراق المطلوبة:
- شهادة الثانوية العامة المصدقة
-صورة عن شهادة الايلتس او التوفل
-الفحص الطبي( فالجامعة بيعطونكم ورقة الفحص الطبي)
-صورة عن شهادة الميلاد
-صورة عن جواز السفر و خلاصة القيد (للمواطنين) او الاقامة (لغير المواطنين)
-صور شخصية
-صورة عن شهادة حسن السيرة و السلوك (تاخذونها من ادارة المدرسة)
-صورة عن بطاقة الهوية
(هاللي اتذكره)
7- نعم الاولوية للمواطنين (ع حسب علمي) ، لان اعرف ناس مب مواطنين كانوا يابين 90 بس ما قبلوهم، و قبلوا مواطنين كانوا يايبين 87،،، و لا تخافين اختي لان نص المقبولين مواطنين...
صح شيء تنافس ، بس انتي لو تيبين نسبة حلوة تيقيني انج تكونين من ضمن المقبولين ان شاء الله :)
8-( حددي لي بالضبط شو اللي تبين تعرفينه عن حياتنا الجامعية، و بكتب لج :) )
و لو بغيتي اي شي ثاني انا موجودة
و السموحة ع القصور

almarashda
11-04-2011, 09:15 AM
اناااا عن نفسي مابي الطب ابي اكمل الهندسة الاني ادرس في معهد التكنولوجيا ومن الحين في قسم الهندسة وان شاء الله اكمل

par
12-04-2011, 07:19 AM
و لو عندكم اي سؤال بالنسبة لكلية الطب فجامعة الشارجة،،، حياكم الله :)

انسة انيقة
28-04-2011, 12:58 AM
زيغتيني ><
اخااااااااااااااااااااااااااااااااااااف ما يقبلوني
انزين المقابلة كيف تكون وانتي شو سؤلوج
وكم كانت نسبتج اخاااااااااااااف مايب النسبة المطلوبة

par
28-04-2011, 02:57 PM
ليش تخافين ما يقبلونج؟
ما يسوون لا مقابلة و لا امتحان ،،، راح يجوفون نسبة الثانوية العامة بسسسسسس .. (طبعا نفس ما كتبت الاولوية للمواطنين ،،، يعني وحدة من ربيعاتي معدلها كان اقل عن 90 و قبلوها //// بالنسبة للوافدين لو معدلج يكون اقل عن 93 الامل يكون ضعيف ،،، بس هالشيء يختلف من سنة لسنة ع حسب الاقبال ،،، و ع حسب نسب المتقدمين ))
بعد ما تقدمين اوراقج تواصلي ويا وحدة اسمها "يسرى" ،،، بتساعدج وايد ،،
طبعا انا نسيت اوضح لج شيء .. بعد ما يعلنون عن اسامي المقبولين بيعطونج مهلة (اسبوع) عسب تدفعين كل الرسوم ، و الا راح يعطون مقعدج لحد ثاني (الللي ما تم قبولهم يكونون في قائمة الانتظار)،،، و عادي شيء ناس ما راح تدفع الرسوم و مقاعدهم بتروح للناس اللي فقائمة الانتظار،، يعني بعد شيء امل :)
بس لا تنسين شيء ،،، لو ناوية ان شاء الله تتخصين طب ، لازم تكونين عارفة انجليزي عدل لان الدراسة تكون بالانجليزي،،، و الاهم انج تحبييييييين الطب ،، لان دراسة الطب مو سهلة ابدا،،، و لا تنسين تصلين استخارة ، و بالتوفيق اختي :)
و لو عندج اي استفسار ثاني حياج

dew 1
28-04-2011, 04:40 PM
وعليكم السلام لكل مجتهد نصيب وعلى قدر تعبج واجتهادج راح تحققين حلمج ولا تيئسي وجامعات الامارات كلهم دراستهم ما عليها جصور وانا طالبة في جامعة عيمان والود ودي بعد ما اتخرج اواصل دراستي في الجامعة طوال حياتي من كثر حبي لها وتميزها والفضل يرجع لكل ايدي معطاء فيها دون استثناء